一如所料，人民幣終於入籃成功(被納入IMF特別提款權SDR籃子貨幣)，不過象徵意義遠大於實質用途，連美聯儲前主席伯南克都出來抽水，佢話就好似小學生功課做得好，老師獎粒星畀你咁小兒科。
本來IMF的角色是作為最後貸款人，不過由於貸款條件太辣：借款人必須大幅削減政府開支、增加市場自由、增稅加費，減少福利和清除腐敗。所以近年已好少國家會用，例如美國次貸大危機和歐債危機，IMF基本上都冇咗影。
IMF被邊緣化，另一原因是有咗更犀利的替代武器：貨幣互換協議。前年，美、歐、瑞、英、加、日等六家央行就決定組成長期、無限額、多邊的貨幣互換協議，為全球貿易提供各種流動性支持。
中國央行都不甘後人，迄今已經和不少國家簽署了貨幣互換協議，總規模或已超過3萬億人民幣。而財大氣粗的中國央行仲撬埋IMF最終貸款人的牆腳，分別給俄羅斯、阿根廷和委內瑞拉等幾個窮兄弟，搞咗幾百到幾十億美元的放款，某程度上已強化了人民幣在協約國央行的儲備貨幣作用。
另一方面，憧憬中央經濟工作會議再有利好房價政策出台，昨日內房股持續前一天的強勢。萬科(02202)曾創出新高，收市升2.6%；華潤置地(01109)升1.5%。二線股追落後，遠洋地產(03377)升5%；融創(01918)升4.8%。附圖(點擊)是今年1-11月各大房企的銷售金額，睇下可否從中尋寶！
內房近期走出新一輪牛市，明顯受惠於中央政府數個月前開始力托房價政策，特別是一再降準減息行動，預期這種趨勢還會繼續。當一個從未見過的低息大環境在中國上演的時候，明年很可能會是A股長牛的開始！有機會再詳細分析。
周公
２０１５年１２月３日＠大方向
沒有留言:
張貼留言