恆指連開６支陰 吊頸都要抖下氣

恆指今日持續弱勢，計埋今天已連開第６支陰燭！而最近１年，只是８月份連開７支陰燭，吊頸都要抖下氣掛？看今次開第幾支陰才開一支陽！

恆指早市承接外圍弱勢，低開８９點見２１７１４，一開波已再創近２個月來的低位，之後曾一度倒升，見過２１８８０，而昨日兩個高位都是在２１８７２附近，即是說最近的阻力位是２１８８０左右，如果博短線反彈，見２１８８０都升唔穿，大家應知咩事及點做！指數在２１８８０位置再度受阻後，上唔到自然要回落，基本上全天都是持續向下，好友似乎無心戀戰，尾市曾跌至２１６６８，為全日低位，兼且再創近２個月新低，最後臨收市大戶掃番上２１７００樓上叫做收得好睇少少，最終收市跌９９點，報２１７０４，低於所有常用平均線，１４天ＲＳＩ走勢仍然向下，反映弱勢持續，雖然已低見３７但仍未見想反彈跡象。ＭＡＣＤ離ＥＭＡ（９）再度拉遠，未見拗腰轉向跡象。國指則跌１０８點，報９４５０，成交保持近日水平，為６８９億。

今天大市雖然以指數計只是跌得嗰９９點，但是很多個別基金股都出現很大程度的跌幅，例如中廣核（１８1６）, 中國建材（３３２３），中鐵（３９０），中交建（１８００），中海外（６８８），比亞廸（１２１１）等。。。都跌超過３％樓上，這些股很多都是基金股，所以筆者合理懷疑是有心人托住指數出貨。

先前開了幾個逃生門，雙降，係人都知經濟唔得先要雙降，所以已有人趁好消息出貨或減持。無中生有深港通，邊個咁得閒發埋啲咁既消息？動機何在？大摩ＭＳＣＩ評增持，評左增持後個個去搶佢點增持？佢評增持，冇講過佢會增持，又一語言偽術。Ａ股見底回升，借勢推番高再派過。ＳＤＲ，有研究都知是雷聲大雨點少，意義大於實質。美股急升，香港唔跟，美股一回少少，香港跟足。每個高位越放越下，２３２００可能是短期頂部，現時２１７００點，向上只有１５００點博，得７％，沿途關卡處處，阻力重重，值博率已是很低！

在連開６支陰下，未來可能開多一支陰，或直接開支陽完結，但又有何用？可升幾多？有什麼藉口再上？

大趨勢是怎樣？很多時都是捉大戶幕後的心理，究竟佢地是想走，定想留！如佢想走，就要找方法走，所以借好消息，作好消息。除了借消息外，仲可以借技術走勢，只要有人信什麼，就做什麼引這些人入局，最終目的，都是為走貨。所以在判斷未來走勢方面，究竟你自己覺得大戶是走定留，才可作不同的假設。

很多人都很喜歡看表面的東西，例如買馬一樣，可以睇賽績，睇晨操等。可是，以筆者想法，咁容易畀人睇到的，通常都是做出來畀人睇，引人落疊。例如，晨操見到某隻馬好好火氣，翻步如輪，力貫四肢。當然啦，喂多啲金山大麥，谷多啲硬料，有氣有力，更唔同款啦。咁啲晨操專家影埋啲晨操出來，隻馬ＦＩＴ到漏油，一出賽時梗係有飛啦。點解最後又跑唔出？其實想佢輸好易，只要臨出賽前，只是剩係畀啲呂宋草佢食，吊住佢條命，隻馬邊有力跑呀，咁出賽自然死火啦。畀人睇到的，就孭晒飛了，大戶就大注買指定冷門，因佢明知隻熱門死梗！

世界就是這樣，很多事都是有人幕後操控，操控者當然唔會講出來我自己操縱緊，但佢有能力做啲ＨＩＮＴＳ出來引班自作聰明的人上釣。

邊樣最真？

搵銀就最真！真金百銀最後５秒先大注落飛的就最真！等你跟都冇得跟！

點解佢地睇得咁準？

仲要問？



YOKI WONG

２０１５年１２月１０日@大方向